Anong tingin mo sa mga liriko tulad ng “Pinsala'y ikinamada” at mga elemento ng musika gaya ng “bubble gum concept”?

Kakaiba ang estilo at ang artistry na ipinapakita ni Dionela at ng Bini sa kanilang mga kanta. Madalas na ikinukumpara ang mga TagLish lyrics na gawa ni Dionela sa mga lyrics ng mga awitin noon. Habang ang BINI naman ay kinukutya sa di umano pagkopya nila sa K-pop. Kaya naman may mga nagsasabi na tila hindi na OPM ang makabagong musikang napakikinggan sa ngayon. Nawala na ang konsepto ng pagka-Pilipino sa mga liriko, wala ng pagka-orihinal sa paggawa ng sariling tunog at ritmo, at unti-unti nang nawawala ang presensiya ng OPM sa makabagong mundo. Tama nga ba ang mga konklusyon at ideyang ito? Ano nga ba talaga ang OPM?

“The term was a label for Philippine pop ballads during 70s and 80s. However, this eventually became a catch-all term for music produced by Filipinos (Greenslade, 2020). 

Samakatuwid, ang OPM o Original Pinoy Music ay mga musikang gawa ng Pinoy. At sa kabila ng mga argumento o negatibong pananaw sa kalagayan ng musikang pilipino ngayon, masasabi pa rin na ang mga makabagong musika ay OPM. Ano man ang tunog at inspirasyong pinagkunan nito.

Gayunpaman, hindi masisisi ang mga tagapakinig kung nais nilang panatilihin ang musikang nakasanayan sa lupang tinubuan. Ngunit, ang pagiging bukas sa transisyon o pagbabago na sumasabay sa agos ng sining sa kasalukuyan ay magiging malaking tulong sa pag-angat ng mga musikerong Pinoy na patuloy na nangangarap at nagtatanghal.